Genesis 38
UJuda loThamari
1Ngalesosikhathi uJuda watshiya abafowabo wahamba wayahlala lendoda yase-Adulani eyayithiwa nguHira. 2Khonale uJuda wabonana lendodakazi yendoda engumKhenani eyayithiwa nguShuwa. Wayithatha wembatha layo; 3yathatha isisu yazala indodana yathiwa ngu-Eri. 4Wazithwala njalo wazala indodana wayithi ngu-Onani. 5Wazala njalo enye indodana wayithi nguShela. Le wayizalela eKhezibi. 6UJuda wazuzela u-Eri izibulo lakhe umfazi, ibizo lakhe linguThamari. 7Kodwa u-Eri izibulo likaJuda, wayengcolile emehlweni kaJehova; yikho uJehova wambulala. 8UJuda wasesithi ku-Onani, “Lala lomkamfowenu ugcwalise umlandu wakho njengomfowabo uzalele umfowenu abantwana.” 9Kodwa u-Onani wakwazi ukuthi inzalo leyo yayingezukuba ngeyakhe; yikho kwakusithi sonke isikhathi angalala lomkamfowabo achithele phansi emhlabathini inhlanyelo ukuze angaze azalela umfowabo abantwana. 10Lokho ayekwenza kwakukubi emehlweni kaJehova; yikho laye wambulala. 11UJuda wasesithi kumalokazana wakhe uThamari, “Hamba uyohlala njengomfelokazi emzini kayihlo indodana yami uShela ize ikhule.” Phela wanakana wathi, “Laye angafa njengabanewabo.” Ngakho uThamari wahamba wayahlala kwabo. 12Ngemva kwesikhathi eside umkaJuda, indodakazi kaShuwa wafa. Kwathi uJuda eseduduzekile waya eThimina, emadodeni ayegunda izimvu zakhe, ehamba lomngane wakhe uHira umAdulami. 13Kwathi uThamari esetsheliwe kwathiwa, “Uyihlozala uyeza eThimina ukuzagunda izimvu zakhe,” 14wakhulula izigqoko zakhe zokuzila wazimboza ngeveli ukuzifihla, wasehlala phansi duzane lesango lase-Enayimi, elisendleleni yaseThimina. Ngoba wabona ukuthi loba uShela wayesekhulile kodwa yena Thamari wayelokhu engamphiwanga ukuthi abe ngumfazi wakhe. 15UJuda wathi embona wacabanga ukuthi libele lendlela, ngokuba wayezimbozile ubuso. 16Kwathi ngoba engamboni ukuthi ngumalokazana wakhe waya kuye eceleni komgwaqo wathi, “Woza manje, ngifuna ukulala lawe.” Yena wabuza wathi, “Uzangiphani ngingalala lawe?” 17Wathi, “Ngizakuthumezela izinyane lembuzi emhlambini wami.” “Uzangipha na ulutho lube yisibambiso ungakalithumezi?” kubuza uThamari. 18Wathi, “Ngikuphe sibambiso bani?” Waphendula wathi, “Isilengiso sophawu lwakho lentambo yaso, kanye lodondolo lwakho oluphetheyo.” Yikho wamupha lezozinto waselala laye, wahle wammithisa. 19Esesuka lapho uThamari wakhumula iveli lakhe wagqoka izigqoko zakhe zokuzila njalo. 20Kusenjalo uJuda wathumezela izinyane lembuzi ngomngane wakhe umAdulami ukuze abuyiselwe isibambiso sakhe esasikowesifazana lowo, kodwa wamswela. 21Wabuza amadoda ayehlala lapho wathi, “Lingaphi lelobele lendlela lesikhonzelo elalilapha eceleni komgwaqo e-Enayimi na?” Athi, “Kakuzange kube khona lowomuntu lapha.” 22Ngakho wasebuyela kuJuda wayakuthi, “Kangimfumananga. Futhi amadoda lawo ayehlala khona athi kakuzange kube lesifebe sesikhonzelo lapho.” 23UJuda wasesithi, “Myekele ahle akugcine khonokho alakho funa sicine sesiyinhlekisa. Ingqe yikuthi mina bengimthumezele izinyane lembuzi, kodwa kawusamfumananga.” 24Ngemva kwezinyanga ezintathu uJuda watshelwa ukuthi umalokazana wakhe uThamari wayesefebile wasethatha isisu. UJuda wathi, “Mkhupheni, atshiswe aze afe.” 25Kwathi khona lapho ekhutshwa wathumela ilizwi kuyisezala wathi, “Ngamithiswa yindoda engumnikazi walezi izinto.” Wengeza ngokuthi, “Akubone longabe uthi ngesikabani isilengiso sophawu lesi lentambo kanye lodondolo lolu.” 26UJuda wazazi izinto lezo wathi, “Ulungile kulami, ngoba kangisamphanga endodaneni yami uShela.” Kasaphindanga wembatha laye njalo. 27Kwathi isikhathi sakhe sokubeletha sesifikile, wayelamaphahla angabafana esiswini. 28Wathi khonapho ebeletha omunye wawo wakhupha isandla; yikho umbelethisi wathatha intambo ebomvu wayibophela esihlakaleni sesandla salo wathi, “Leli yilo eliphume kuqala.” 29Kodwa labuyisela isandla, umfowabo waphuma kuqala, wasesithi, “Wo, yiyo indlela ofohle ngayo le!” Laseliphiwa ibizo elithi nguPherezi. 30Yikho umfowabo, owayelentambo esihlakaleni, waphuma wathiwa ibizo elithi Zera.
Copyright information for
NdeIBE